Original Author:
Eva Haralambidis-Doherty
An amazing Recital scene:
https://youtu.be/JjdhgyLxkJo
From this Charlie Kaufman film:
I'm Thinking Of Ending Things (2020)
-----------------------------:Disclaimer:---------------------------------------
All rights inhere belong to the original authors and
rights holders at the source material. This presentation
is intended solely as an exercise in creative expression.
It does not intend to hereby infringe upon any of the
rights pertaining to the original work. Yours Truly
do not see any AI-eye ayeings in this either.
ಎಲ್ಲ ಹಕ್ಕುಗಳೂ ಮೂಲದಲ್ಲಿನ ಕೃತಿಕಾರರು-ಹಕ್ಕುದಾರರುಗಳಿಗೇ ಸೇರಿದ್ದು.
ಈ ಪ್ರಸ್ತುತಿಯಿರುವುದು ಸೃಜನೀಯ ಅಭಿವ್ಯಕ್ತಿಯ ಅಭ್ಯಾಸದ ಭಾಗವಾಗವಷ್ಟೇ
ಹೊರತೂ ಮೂಲಕೃತಿಯ ಯಾವುದೇ ಹಕ್ಕುಗಳನ್ನು ಈ ಮೂಲಕ ಅತಿಕ್ರಮಿಸಲಲ್ಲ.
ಇದರಲ್ಲಿ ಏಐ-ಕೈ ಶ್ರೀಶ್ರೀಶ್ರೀ ಮೂರ್ಶ್ರೀ ನಾವಪ್ಪಗೋಳಿಗಂತೂ ಕಂಡಿಲ್ಲ.
=================================================
Warnings:
Pessimistic diss-out of everyday life...
Bit of misogyny, that too by a poetessa...
#scenic #cynic
ಮೂಳೆನಾಯಿ
ಮನೆಗೆ ಬರುವುದದು ಘೋರ
ನಾಯಿಗಳು ನಿಮ್ಮ ಮುಖ ನೆಕ್ಕಲೀ—ಬಿಡಲಿ;
ನಿಮಗೊಂದು ಹೆಂಡತಿಯಿರಲಿ, ಅಥವಾ—
ಹೆಂಡತಿಯಾಕಾರದಲಿ ಒಂಟಿತನವೊಂದಷ್ಟೆ ಕಾದಿರಲಿ.
ಮನೆಗೆ ಬರುವುದೆಂದರೆ ಕೆಟ್ಟ ಏಕಾಕಿತನವು,
ಹಾಗಾಗಿಯೇ ನೀವು ನೆನಸುವುದು
ಈಗಷ್ಟೇ ಬಿಟ್ಟು ಬಂದ ಜಾಗದಿಕ್ಕಟ್ಟಿನ
ವಾತಾವರಣದಂಥಾ ಒತ್ತಡವನು—
ನಲುಮೆಯಿಂದ,
ಏಕೆಂದರೆ ಎಲ್ಲವೂ ಹದಗೆಡುತ್ತೆ
ನೀವು ಮನೆ ಸೇರಿದಂತೆ.
ಯೋಚಿಸುವಿರಿ ನೀವು—
ಹುಲ್ಲುಗಂಟಿಗಳಿಗಂಟಿಕೊಂಡಿರೋ
ಕೀಟಗಳ ಬಗೆಗೆ,
ಹಾದಿಗಂಟಿಕೊಂಡಂತೆ ಸುದೀರ್ಘ
ಗಂಟೆಗಳ ಬಗೆಗೆ,
ಹಾದಿಬದಿ ಬಿದ್ದಿರೋ
ಸಹಾಯವಾಣಿಗಳ ಬಗೆಗೆ,
ಐಸ್ಕ್ರೀಮ್ಗಳ ಬಗೆಗೆ, ಹಾಗೇ
ಆ ಕೆಲ ವಿಚಿತ್ರ ಆಕಾರ ತಳೆದಿರೋ
ನೀರ್ಮೋಡಗಳ ಬಗೆಗೆ, ನೀರವಗಳ ಬಗೆಗೆ,
ಉತ್ಕಟವಾಗಿ—ಏಕೆಂದರೆ ನೀವು ಹಿಂಬರಬಯಸಿರಲಿಲ್ಲ.
*
ಮನೆಗೆ ಬರುವುದು
ಅಸಹನೀಯವಷ್ಟೇ.
ಮತ್ತೆ ಆ ಮನೆವಾತಾವರಣದ ನೀರವ ನಿರ್ಮೋಡಗಳು
ನೀಡುವುದು ಮತ್ತದೇ ಸರ್ವೇಸಾಮಾನ್ಯ ಜಾಡ್ಯ ಮಾತ್ರವೆ.
*
ಆ ಮೋಡಗಳು, ಅವುಗಳ ಸ್ವಭಾವವೇ ಹಾಗಿರುವಂತೆ
ವಾಸ್ತವದಲ್ಲಿ ಶಂಕೆ ಮೂಡಿಸುವಂತಹವು;
ತೆರಳುವಾಗ ನೀವು ಬಿಟ್ಟದ್ದಕ್ಕೂ ಮಿಕ್ಕಂತೆ
ಮತ್ಯಾವುದೋ ಪದಾರ್ಥಗಳಲ್ಲಿ ತಲೆದೋರುವಂತಹವು.
ನೀವು ಕೂಡ ತುಂಡರಸಿದ್ದು
ಬೇರೊಂದು ಮೋಡಮುಸುಕಿನ ಬಟ್ಟೆಯಿಂದ,
ಹಿಮ್ಮರಳಿಸಿದ್ದು,
ಮಿಕ್ಕುಳಿಸಿದಂತಾದದ್ದು,
ಬೆಳದಿಂಗಳಿಂದ ಅಪಸಂಧಿಗೀಡಾದದ್ದು,
ಮರಳಲು ಅಸಂತುಷ್ಟವಿದ್ದದ್ದು,
ತಪ್ಪು ಎಡೆಗಳಲ್ಲೆ ಬಿಗಿತ ತಪ್ಪಿದ್ದು,
ಹೊಲಿಗೆ ಕಾಣುವ ನಿಕೃಷ್ಟ ಬಟ್ಟೆಗಳ ಸೂಟು,
ಹೊಲಸು ಒರಸೋದು, ಧರಿಸಿ ಬಿಟ್ಟದ್ದು.
ಮನೆಗೆ ಬರುವಿರಿ ನೀವು
ಚಂದ್ರಯಾನಿ, ಪರಕೀಯ;
ಭೂಮಿಯ ಗುರುತ್ವದೆಳೆತ
ಈಗಲ್ಲಿ ಪುನಃ ದುಪ್ಪಟ್ಟು ಪ್ರಾಯಾಸ;
ಎಳೆಯುತ್ತಾ ನಿಮ್ಮ ಶೂ ಲೇಸುಗಳನ್ನ
ಮತ್ತು ನಿಮ್ಮ ಮೈದೋಳುಗಳನ್ನ..,
ಆಳಕೊರೆದ ಸಾಲುಗಳಾದಂತೆ
ಸುಕ್ಕುಗಂಟಿಕ್ಕಿದೆ ನಿಮ್ಮ ಹಣೆ.
ಮನೆಗೆ ಬರುವಿರಿ ನೀವಿನ್ನಷ್ಟು ಆಳಕಂಡಂತೆ
ತಳಮುಟ್ಟಿದ ಬಾವಿ ಜಬ್ಬಾಗಿ
ಬೆಸೆದುಕೊಂಡಂತೆ ನಾಳೆಗೊಂದೆಳೆ...
ಏನಾದರಾಗಲಿ...
ಏಕಪ್ರಕಾರದ ದಿನಗಳ ದಾಳಿಗೆ ನಿಟ್ಟುಸಿರು ಬಿಡುವಿರಿ.
ಯಾರದರೂ ಅಷ್ಟೇ ಏನೋ... ಕೆಲವೊಮ್ಮೆ...
ಬಿಡಿ...
ಏನಾದರಾಗಲಿ...
ನೀವು ಮರಳಿದ್ದೀರಿ.
ಸೂರ್ಯನೇರಿಳಿವ
ದಣಿದ ಬೆಲೆವಣ್ಣಂತೆ,
ಹವೆಯು ಜಡವು
ಮುರಿದ ಕೀಲಂತೆ,
ವಯಸ್ಸಾಗುತಿದೆ ನಿಮಗಷ್ಟೆ
ಇದೆಲ್ಲದರ ನಡುವೆ.
*
ಚಲಿಸುವುದಿನ್ನೇನಿಲ್ಲ ನಿಮ್ಮ
ದೇಹದುಪ್ಪಿನ ಕಡಲುಬ್ಬರದ ಹೊರತೂ.
*
ನಿಮ್ಮ ದೃಷ್ಟಿ ಮಸುಕು.
ಒಯ್ಯುವಿರೀಗ ನಿಮ್ಮ ಜೊತೆ ನಿಮ್ಮ ಹವೆಯನ್ನು...
ಆ ಬೃಹನ್ನೀಲಿ ತಿಮಿಂಗಿಲ,
ಎಲುಬಿನ ಹಂದರ, ಅಸ್ಥಿ
ಕತ್ತಲೆ.
ನೀವು ಹಿಂದಿರುಗಿ ಬರುತ್ತೀರಿ
ಕ್ಷ-ಕಿರಣ ದೃಷ್ಟಿಯೊಂದಿಗೆ.
ಹಸಿವೊಂದು ಮೈವೆತ್ತಿದಂತಾಗಿ ನಿಮ್ಮ ಕಂಗಳು.
ನೀವು ಮನೆಗೆ ಬಂದಿದ್ದೀರಿ
ನಿಮ್ಮ ರೂಪಾಂತರೀ ವರಗಳೊಂದಿಗೆ
ಅಸ್ಥಿಹಂದರದ ಗೃಹವೊಂದಕ್ಕೆ.
ನಿಮಗೆ ಕಾಣಿಸುವುದೆಲ್ಲವೀಗ,
ಸಂಪೂರ್ಣವಾಗಿ,
ಮೂಳೆಗಳು.