ಗೀತೆ: ಹೇ ಕಾಲಾ ಬಂದರ್
ರಚನೆ: ಶ್ರೀಶ್ರೀಶ್ರೀ ಮೂರ್ಶ್ರೀ ಪ್ರಸೂನ ಜೋಶಿ
ಸಂಗೀತ: ಶ್ರೀಮಾನ್ ಎ ಆರ್ ರಹಮಾನ್
ಗಾಯನ: ಬ್ಲೇಝ್, ಬೆನ್ನಿ ದಯಾಳ್, ತನ್ವಿ ಶಾ, ವಿವಿಯಾನ್ ಚೈಕ್ಸ್, ಕ್ಲೇರ್
ಚಿತ್ರ: ದಿಲ್ಲೀ-6 (2009)
ದಿಗ್ದರ್ಶನ: ಶ್ರೀ ರಾಕೇಶ ಓಂಪ್ರಕಾಶ ಮೆಹ್ರಾ
ಅನುರಣವಾದನ: ಶ್ರೀಶ್ರೀಶ್ರೀ ಮೂರ್ಶ್ರೀ ನಾವುಗಳು
-----------------------------------------------------------------------------------------------------
Disclaimer: ಎಲ್ಲ ಹಕ್ಕುಗಳೂ ಮೂಲದಲ್ಲಿನ ಕೃತಿಕಾರರು-ಹಕ್ಕುದಾರರುಗಳಿಗೇ ಸೇರಿದ್ದು.
ಈ ಪ್ರಸ್ತುತಿಯಿರುವುದು ಸೃಜನೀಯ ಅಭಿವ್ಯಕ್ತಿಯ ಅಭ್ಯಾಸದ ಭಾಗವಾಗವಷ್ಟೇ
ಹೊರತೂ ಮೂಲಕೃತಿಯ ಯಾವುದೇ ಹಕ್ಕುಗಳನ್ನು ಈ ಮೂಲಕ ಅತಿಕ್ರಮಿಸಲಲ್ಲ.
========================================================
=======================================================
ಈ ಸಿನಿಮಾಸಂದರ್ಭವು ನಿಜಜೀವನದೊಂದು ವಿಚಿತ್ರ ಸಿನಿಮೀಯ ವಿದ್ಯಮಾನಾಧರಿತವು:
https://en.wikipedia.org/wiki/Monkey-man_of_Delhi
"ಈ ಮಂಕಿಮ್ಯಾನ್ ಯಾನೆ ಕಾಲಾಬಂದರ್ ಎಂಬುದೊಂದು 2001ರಲ್ಲಿ ದೆಹಲಿಯಲ್ಲಿ
ವಿಪರೀತವಾಗಿ ವರದಿಯಾದ ನರ-ವಾನರ ರೂಪ/ವೇಷದ ವಿಚಿತ್ರಜೀವಿಯೆನ್ನಲಾದ
ಉಪದ್ರವಗಳ ಅಂತೆಕಂತೆಗಳ ಬೊಂತೆ..."
ಮೂಲದ ಸಾಲುಗಳು ಓದಲಿಕ್ಕೇ ಬೇಕಪಾಂತಂತಂದ್ರ ಇಲ್ಲಿ ಕ್ಲಿಕ್ಕಿಸಿ ನೋಡಿ.
=======================================================
ಹೇ ಮಸಿ ಮಸಿ ಮಸಿ ಮುಸಿ ಮಂಗ್ಯ
ಹೊರ ಬಂದರss ಒಳಗ್ ಕಂಡ್ಯ
ಹೇ ಮಸಿ ಮಸಿ ಮಸಿ ಮುಸಿ ಮಂಗ್ಯ
ಹುಡಕ್ಕೊಂಡವ ಕಿಂಗ್ ಯಾ ||ಪಲ್ಲವಿ||
**
ಬರೀ ನಾನಷ್ಟss ಅಲ್ಲಾ ರೀ
ಎಲ್ರೂ ಹುಡುಕಿದ್ ಅಲ್ಲಿ
ಬರೀ ಒಂದ್ ಮಂಗ್ಯನಾ ರೀ
ಎಲ್ರೀ ಮುಸೀ ಮಂಗ್ಯ, ಎಲ್ರೀ ಮುಸೀ ಮಂಗ್ಯ,
ಎಲ್ರೂ ಹುಡುಕಿದ್ ಅಲ್ಲಿ ಬರೀ ಮಂಗ್ಯನಾ ರೀ ||ರ್ಯಾಪ್||
**
ಬರ್ರಾ ಕಣ್ಣಡಕವ ಕಾಣ್ವ
ಕಂಣಡಿಯಾ ಕರೆಯಾ ಕಾಣ್ವ
ತಮ್ಮ ತಮದಾ ಖರೇ ಕೋತಿಯ ಕಾಣ್ವ
ನಮದಸಲಾ ಬರಕತಿಯಾ ಕಾಣ್ವ
*
ಮುಸುಕು ಮರೆಯ ಆಳದಾಗ
ರೆಕ್ಕಿ ಬಾವಲಿ ಬಿಚ್ಚಿತ್ತಲೇ
ಝಗಮಗ ಬಿಳಿ ಬಟ್ಟಿಯಾಗ
ಸಸ್ತನೀ ಸತ್ಯ ಸತ್ತಿತ್ತಲೇ
**
ಹೀರೋ ಹೀರೋ ಸರೀ ಹೀರೋ
ಲೈಫಿನತಿಸಾರವದು
ಜೋರು ಜೋರು ನೋಡ್ರಾ ಜೋರು
ಎದಿ ಚೂರು ಹಾರ್ವುದು ||ಅನು ಪಲ್ಲವಿ||
***
ಮಂಗನಾಣೆ ಶೇಂಗಾದ್ಹಾಂಗ
ದೆಂಗುವುದು ಸಿಕ್ಕು ಸಿಕ್ಹಾಂಗ
ಸಾಕುಸಾಕು ಅನ್ನೋದು ಬಾಯಾಗ
ಕೈ ಒಡ್ಡುತ ಮುಂದಕ ಮುಂದ
*
ಒಂದೆ ಜಡೆಯ ಅಕ್ಕಾತಂಗೀ
ಆಸೆಗಳೋ ಬರಿ ನವರಂಗಿ
ನಟಿಸು ಮತ್ತ ನಾಟಕ ಭಂಗಿ
ಧರಿಸೀ ಮೆರಿ ಸುಳ್ಳ ನೂರಂಗಿ
**
ಹೀರೋ ಹೀರೋ ಸರೀ ಹೀರೋ
ಲೈಫಿನತಿಸಾರವದು
ಜೋರು ಜೋರು ನೋಡ್ರಾ ಜೋರು
ಎದಿ ಚೂರು ಹಾರ್ವುದು ||ಅನು ಪಲ್ಲವಿ||
***
ಎರಡು ಫೂಟುದ್ದ ಮಂಗ್ಯಾನಂತ ಅಂವ, ನಿಂ ಕಾಲ ಕಚ್ತಾನಂತರೀ!
ಉಕ್ಕಿನಾ ಹಲ್ಲಂತ, ಪ್ಯಾಂಟ ಮ್ಯಾಗ ಸೂಪರ್ಮ್ಯಾನ ಕಾಚಾರೀ!!
{ಹೌದಂತೀನಿ!!!}
ಮತ್ತ ಮನ್ನಿ ನಂ ಮನೀ ಮೇಲಾ ಹಾರ್ತಿದ್ದ ರೀ!
ಹ್ಯೇ.. ಅಂವ ಮಾಯಾಮಂಗ, ಅಂಜನಾ ಹಾಕ್ ನೋಡಿದ್ಞ ರೀ!!
ಅನ್ಯಗ್ರಹದಾಂಜನೇಯ, ಸೂರ್ಯಂಗ್ ಕೊಟ್ ಮುಖಾ ಸುಟ್ಗೊಂಡವಾ ರೀ!!!
{ಅಸಾಧ್ಯ!}
ಹ್ಯೇ. ಆದೊಂದ್ ಮಂಗ್ಯನಂತ ಯಡವಟ್ಟ್ ಎಕ್ಸ್ಪೆರಿಮೆಂಟಂತರೀ!
ಬರ್ಮಾ ಬಝಾರ್ ಐಟಮ್ಸಿಗೆ ಆಟಂಬಾಂಬ್ ಫಿಟ್ಟಿಂಗಂತರೀ!!
ನರ-ವಾನರ-ರೋಬಾಟ ಮಿಕ್ಸ ಸೈಬೋರ್ಗಂತಾರ್ರೀ!!!
{ಕತಿಯಾತಿದು!}
ಹೋಗ್ಲೀ, ನಿಜ್ಜಾ ಅಂವನ್ನ ಕಂಡಿದ್ದು ಯಾರ್ರೀ?!
ಯಾರಿಗೊತ್ತು!!
ಮತ್ತ!!!
ಇವೆಲ್ಲ ಬರೀ ಜಾರಿಕೀ ರೀ...||ರ್ಯಾಪ್||
**
ರೀತಿ ರಿವಾಜೆಲ್ಲ ಗಾಳಿಗೆ ತೂರ್ರಲೆ
ನಿಮ್ಮೊಳಗ ನೀವ್ ಇಣುಕೀ ನೋಡ್ರಲೆ
ಎಲ್ಲೋ ಯಾವುದೋ ಕ್ವಾಣೀಯೊಳಗಡೆ
ಕರಿ ಮುಸೀ ಮಂಗ್ಯಾ ಹೊಕ್ಯಾಡೈತಲೆ
*
ಎಷ್ಟು ಪರದೆ ಎಷ್ಟು ಪರದೆ ಎಷ್ಟು ಪರದೆ ಎಷ್ಟು ಪರದೆ
ಎಷ್ಟು ಪರದೆ ಎಷ್ಟು ಪರದೆ ಎಷ್ಟು ಪರದೆ ಎಷ್ಟು ಪರದೆ
ಪ್ರತೀ ಪರದೀಯಾ ಹಿಂದಕು ಪರದೀ
ಪರದಿಯ ಹೊರಕೋ ಗರಿಗರಿ ವರ್ದೀ
ಪರದಿಗಳಾಳದಿ ಕೀವಿನ ಶರಧಿ
ಹುಣ್ಣಿವೆ ಕಾಣಿರಿ ಹುದುಗಿದ ವ್ಯಾಧಿ
ಸೆರೆಯುಬ್ಬರಿಸಿ ಬಂದರು ಬೆದಕಿ
ತಿಳಿದೂ ತಿಳಿಯದ ತಿಳಿಯಲೆ ಬದುಕಿ
ಇದು ಹುಚ್ಚುತನವೋ ಇಲ್ಲ ದಡ್ಡತನವೋ
ರಾಜ ಬೀದಿಲಿ ಬೆತ್ತಲೆ ತಿರುಗಿ
ನಿರ್ಲಜ್ಜ ನಶೆಯಲಿ ಬದುಕನು ಮುಗಿಸಿ
**
ಹೀರೋ ಹೀರೋ ಸರೀ ಹೀರೋ
ಲೈಫಿನತಿಸಾರವದು
ಜೋರು ಜೋರು ನೋಡ್ರಾ ಜೋರು
ಎದಿ ಚೂರು ಹಾರ್ವುದು ||ಅನು ಪಲ್ಲವಿ||
***
ಈ ಮಂಗಾ ನಂಗಿಷ್ಟಾನಾ,
ಅದೇನ್ ಬಂದಾಂತೀರ್ರೀ!
ಬದಲಾಗೇ ಹೋತು ನಂ ಜೀವನದ ಪರಿ
ಏನೆಲ್ಲಾ ವ್ಯವಸ್ತಾ ಇಲ್ಲಿ ಅಗೇ ಬಿಡ್ತರೀ
ಎಲ್ಲೆಲ್ಲೂ ಮಸ್ತ ಪೊಲೀಸರಾ ಗಸ್ತ ರೀ
ಹಾಂಗಾಗಿ ರಾತ್ರಿ ನೋ ವರಿ ಸುಸ್ತ ಮಕ್ಕೋಂತೇವರೀ
ಕರೆಂಟಂತೂ ಹೋಗಾಂಗೇ ಇಲ್ಲ ತಗೋರೀ
ಬಿಗ್ಬಾಸ ಕಣ್ ಮತ್ತ ತಪ್ಸಾಂಗಿಲ್ಲ ನೋಡ್ರೀ!
*
ಮಂಗ್ಯಾನ್ ಸಂಗ ನಂಗ ಹಿಂಗಾ ಇರ್ಲಿ ರೀ
ಮತ್ತ ನನ್ನೇ ಹುಚ್ ಮಂಗ್ಯಾಂತ ಒಳಗ್ಹಾಕಿ ಬಿಟ್ಟೀರಿ!
ಮಂಗ್ಯಾನ ಹಾವಳಿ ಹಿಂಗಾ ನಡೀತಿರ್ಲೀ ಬಿಡ್ರೀ
*
ಮಂಗ್ಯಾ ಮುಸೀ ಮಂಗ್ಯಾ, ಬಿಟ್ಹೋಗ್ ಬ್ಯಾಡ ಲೇ!
ಮಂಗ್ಯಾ ಮುಸೀ ಮಂಗ್ಯಾ,, ನಿಂ ಕಾಲ್ ಹಿಡಿತೀನಲೇ! ||ರ್ಯಾಪ್||
**
ಹೀರೋ ಹೀರೋ ಸರೀ ಹೀರೋ
ಲೈಫಿನತಿಸಾರವದು
ಜೋರು ಜೋರು ನೋಡ್ರಾ ಜೋರು
ಎದಿ ಚೂರು ಹಾರ್ವುದು ||ಅನು ಪಲ್ಲವಿ||
---------------------------------------------------------------------------------
ಕೊಸರು: ಏನಂದರೂ ಮೂಲತಃ ಜಾಹೀರಾತು-ಜಿಂಗಲ್ಲುಗಳ ದುನಿಯಾದ ಪಕ್ಕಾ ವೃತ್ತಿಪರನಾಗಿದ್ದ ಈ ಸಿನಿಕವಿಯು,
ಈ ಮುಂಚೆ ಹಾಗೆ "ನರನರನೊಳಗಡೆಯೊಂದೊಂದು ಕರಿಮಂಗನಿದ್ದಾನೆ' ಎಂದು ಕಾಣಿಸಿದ್ದವನಿಗೆ
, "ನರೇಂದ್ರನೊಳಗಡೆ ಎಲ್ಲ ಜವಾಬ್ದಾರಿಗೂ 'ಕೈ'ಕೊಟ್ಟು ಜೋಳಿಗೆಯೆತ್ತಿ ನಡೆದುಬಿಡುವ ಬರಿ ಫಕ್ಕೀರನಿದ್ದಾನೆ"
ಎಂಬ ಮುಂಗಾಣ್ಕೆಯನ್ನು ಝೆನ್ ಕೂಲ್ ಆಗಿ ಸಾಕ್ಷಾತ್ ನರೇಂದ್ರನೆದುರಲೇ ನೇಂದ್ರ ಕದಳೀ
ಸುಳಿದಾನಂದಿಸುವಂದದಿ
ಜಗಜ್ಜಾಹೀರುಗೊಳಿಸಲು ಸಾಧ್ಯವಾಗಿದ್ದುದು, ಇಂದಿನ ಜೇನ್-ಝೀ
ಜಿರಳೆಗಳಿಗೀತಲೂ ತಲೆಮಾರಿನಷ್ಟು ಹಿಂದೆಯೇ
ಎಂಬುದನ್ನು ಇಲ್ಲಿ ನೆನೆಯಲು ಅದೆಷ್ಟು
ಅಭಿಮಾನ ಉಕ್ಕಿ ಬರುತ್ತಿಲ್ಲ ಹೇಳಿ!!!
ವಿ.ಸೂ.: ಇದೇನಿದು ಮಂಗನಿಂದ ವಿಕಾಸವಾದ ಮಾನವನ ಹೊಸ ತಳಿಮಾರು ಬಿಳಿಜಿರಲೆಗಳಾಗಿರುವ
advanced e-ಕಾಲದಲ್ಲಿ, ಪುನಃ ಮಾನವನಲ್ಲಿ ಮಂಗನನ್ನ ಕಾಣಲು ಹಿಂದಿರುಗಬೇಕಾ
ಎಂದು ಬೇಸರಿಸಿದಿರಾ? ಚಿಂತೆ ಬೇಡ! ಈ ಕರಿಮಂಗನನ್ನು ಆ ಬಿಳಿಜಿರಲೆಯಾಗಿ ಕಾಫ್ಕಾನಂದದಿ
ರೂಪಾಂತರಿಸುವ ಆಪರೇಷನ್ನನ್ನೂ ಮೂರ್ಶ್ರೀ ನಾವುಗಳು ಶೀಘ್ರ ಕೈಗೊಳ್ಳಲಿದ್ದೇವೆ, ಕಾಯಿರಿ!!!
---------------------------------------------------------------------------------
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ